|
ԻԱՊԻ-ի պատվիրակության մասնակցեց Ֆրանսիայի Ժան Մուլեն Լիոն 3 համալսարանի աշխատաժողովին
Որպես ERASMUS+ K2 Բարձրագույն կրթության կարողությունների զարգացում ARMDOCT (armdoct.com) ծրագրի գործընկեր կազմակերպություն, ՀՀ ԳԱԱ Ինֆորմատիկայի և ավտոմատացման պրոբլեմների ինստիտուտի պատվիրակությունը ապրիլի 25-ից 27-ը մասնակցեց Ֆրանսիայի Ժան Մուլեն Լիոն 3 համալսարանում անցկացվող հերթական աշխատաժողովին։ԻԱՊԻ-ի պատվիրակները ծանոթացան Ֆրանսիայում դոկտորական կրթության կառուցվածքին, դոկտորական նորագույն և միջդիսցիպլինար ծրագրերին։ Ներկայացվեցին ծրագրի շրջանակներում Հայաստանի բուհերում հիմնադրվող դոկտորական դպրոցները և դոկտորական դպրոցների բարեփոխմանն ուղղած աշխատանքները։
Աշխատաժողովին մասնակցում էին ավելի քան 60 ներկայացուցիչներ տարբեր կազմակերպություններից, այդ թվում՝ ՀՀ կրթության, գիտության, մշակույթի և սպորտի նախարարությունից, ԵՄ և ՀՀ գործընկեր համալսարաններից և գիտահետազոտական հաստատություններից:
Սեմինարը մասնակիցներին հնարավորություն ընձեռեց ծանոթանալու Ֆրանսիայում դոկտորական կրթության հաստատման ընթացակարգերին, վերջին բարեփոխումներին, դոկտորական ծրագրերի ժամանակակից ճարտարապետությանը, համաղեկավարման և ղեկավարման հարցերին և այլ համապատասխան թեմաներին: Ներածական ելույթներով հանդես եկան Ժան Մուլեն Լիոն 3 համալսարանի միջազգային հարաբերությունների գծով փոխնախագահ, պրոֆեսոր Իզաբել Դելպլան, հետազոտական գծով փոխնախագահ, պրոֆ. Գիյոմ Ռուսեթը, ARMDOCT ծրագրի տեղական համակարգող Արևիկ Օհանյանը, որտեղ ընդգծվեց Ֆրանսիայի և հայաստանյան բուհերի միջև երկարաժամկետ համագործակցությունը։ Օրակարգը հագեցած էր տարբեր թեմաներով, ինչպիսիք են կառավարման և տնտեսագիտության, իրավունքի դոկտորական ծրագրերի ոլորտներում ձեռքբերումներով: Բացի այդ, ներկաները ծանոթացան կրեդիտավորման եվրոպական համակարգին, որակի ապահովման հարցերին: Հայաստանի ներկայացուցիչները ակտիվ մասնակցություն ունեցան Հայաստանում բացվող դոկտորական ծրագրերի և դպրոցների վերաբերյալ խմբային քննարկումներին։ Հատկանշական է Հայաստանում վեց առանձին և երկու համագործակցային դոկտորական ծրագրերի առաջիկա գործարկումը։ Այս շրջանակներում կգործարկվի ՀՖՀՀ-ի և ԻԱՊԻ-ի համատեղ Համակարգչային գիտություն դոկտորական դպրոցը։
|
|
|