|
Եռօրյա աշխատաժողով «Բարձրագույն կրթության երրորդ մակարդակի զարգացման հայեցկարգի ԵՎ իրավական փաստաթղթերի մշակում» խորագրով ARMDOCT ծրագրի շրջանակներում
Հոկտեմբերի 14-16-ը Ծաղկաձորում կայացավ «Դոկտորական կրթության բարեփոխումը Հայաստանում՝ ակադեմիական համայնքի, արդյունաբերության պահանջներին և ԵՄ փորձին համապատասխան» (ARMDOCT) Էրազմուս+ Կարողությունների զարգացման ծրագրի շրջանակներում եռօրյա աշխատաժողովը։
«Բարձրագույն կրթության երրորդ մակարդակի զարգացման հայեցակարգի և իրավական փաստաթղթերի մշակում» խորագրով աշխատաժողովին մասնակցեցին նաև Գիտությունների ազգային ակադեմիայի ինֆորմատիկայի և ավտոմատացման պրոբլեմների ինստիտուտի ներկայացուցիչները որպես ծրագրի գործընկեր կառույց։
Աշխատաժողովն ուներ խնդրի շահառու մասնակիցների լայն ներառվածություն։ Եռօրյա աշխատաժողովին մասնակցում էին նաև ներկայացուցիչներ ծրագրի անդամ հայաստանյան և ԵՄ բարձրագույն ուսումնական հաստատություններից, ինչպես նաև ներկայացուցիչներ կառավարությունից՝ ՀՀ Էկոնոմիկայի, ԲՏԱ, Ֆինանսների և Կրթության, գիտության, մշակույթի և սպորտի նախարարություններից։
Բացման ելույթներն ու ծրագրի ընթացքը ներկայացնելուց հետո աշխատաժողովն ընդգրկում էր ակտիվ թեմատիկ և պանելային քննարկումներ, որոնք թույլ տվեցին ոլորտի ներկայացուցիչներին վերհանել առկա իրավիճակն ու խնդիրները, իսկ ԵՄ բարձրագույն հաստատությունների նեչկայացուցիչներին՝ կիսվել իրենց փորձով։
Նշենք, որ ARMDOCT նախագիծը Հայաստանում ֆրանսիական համալսարանի նախաձեռնությունն է, որի հիմքում ընկած է Էրազմուս+ «Եվրոպական ինտեգրացիային համահունչ բարձրագույն կրթության 3-րդ աստիճանի որակի ապահովման համակարգի ներդրում՝ խթանելու հետազոտությունների միջազգայանացումը» (C3QA) նախագծի փորձը և հիմնական արդյունքները։
ARMDOCT ծրագրի տևողությունը 36 ամիս է. այն կգործի մինչև 2023 թվականը։
Նախագծի վերաբերյալ մանրամասն տեղեկատվություն կարող եք գտնել հետևյալ հղումներով․ www.eiu.am, www.armdoct.com.
|
|
|